વાંકાનેરના મેસરીયા નજીક હાઇવે પર અજાણ્યા ટ્રક ચાલકે હડફેટે લેતાં કચરો વિણવાનું કામ કરતા આધેડનું મોત….
વાંકાનેર તાલુકાના મેસરીયા ગામ પાસે નેશનલ હાઈવે નજીક રહી કચરો વિણવાનું કામ કરતા અને રખડતું જીવન જીવતા એક આધેડને રોડ ક્રોસ કરતી વેળાએ અજાણ્યા ટ્રક ચાલકે હડફેટે લેતા ગંભીર રીતે ઇજાગ્રસ્ત આધેડનું મોત થયું હતું, જેથી આ બનાવની વાંકાનેર તાલુકા પોલીસે નોંધ કરી ધોરણસરની કાર્યવાહી હાથ ધરી છે….
બનાવની પ્રાપ્ત વિગતો મુજબ વાંકાનેર તાલુકાના મેસરિયા નજીક કચરો વિણવાનું કામ કરી રખડતું ભટકતું જીવન જીવતા મૂળ ગોધરાના વતની ધનુબેન ભીખાભાઇ બારૈયા અને દિનેશ નામનો શ્રમિક છેલ્લા છ મહિનાથી સાથે રહેતા હોય, જેઓ ગત તા.23ના રોજ કચરો વિણી પરત ઝુંપડા તરફ આવી રહ્યા હોય ત્યારે મેસરિયા ગામના પાટિયાથી આગળ હાઇવે પર રસ્તો ક્રોસ કરવા જતા વાંકાનેર તરફથી આવતા એક અજાણ્યા ટ્રક ચાલકે દિનેશભાઇને હડફેટે લઈ લેતા ગંભીર ઇજાઓ પહોંચતા તેનું મોત થયું હતું, જેથી આ બનાવમાં મૃતક દિનેશભાઇના પરિવાર કે અન્ય કોઈ વિગતો ન હોય હાલ ધનુબેનની ફરિયાદને આધારે પોલીસે અજાણ્યા ટ્રક ચાલક વિરુદ્ધ ગુનો નોંધી બનાવમાં વધુ તપાસ શરૂ કરી છે….
